Шавкат Мирзиёев Корея Республикаси Миллий Ассамблеяси Спикери билан учрашди
Учрашувда 2027 йилда дипломатик муносабатларнинг 35 йиллиги муносабати билан қўшма парламент тадбирлари ўтказишга келишилди.
Президент Шавкат Мирзиёев 15 сентябрь куни Корея Республикасига давлат ташрифи доирасида Миллий Ассамблея Спикери Чо Чжон Шик билан учрашди.
Мулоқотда Ўзбекистон ва Корея ўртасидаги алоҳида стратегик шерикликни янада ривожлантиришда парламентлараро алоқаларнинг муҳим ўрни қайд этилди.
Томонлар парламентлар ўртасидаги “дўстлик гуруҳлари” фаолиятини кучайтириш, делегациялар алмашинувини давом эттириш ҳамда қонун чиқарувчи органларнинг тегишли қўмиталари ўртасида тажриба алмашинувини кенгайтириш масалаларини муҳокама қилдилар.
Шунингдек,Миллий Ассамблея ва Корея халқаро ҳамкорлик агентлиги кўмагида Ўзбекистон Олий Мажлисининг ҳар икки палатасида амалга оширилаётган “Электрон парламент” лойиҳаси ҳам алоҳида таъкидланди.
Олий даражада эришилган савдо-иқтисодий, инвестициявий ва маданий-гуманитар келишувларнинг амалий ижросини парламент мониторинги орқали таъминлаш бўйича ҳамкорлик механизмини яратиш зарурлиги билдирилди.
Учрашув якунида 2027 йилда Ўзбекистон ва Корея ўртасида дипломатик муносабатлар ўрнатилганининг 35 йиллиги муносабати билан парламент дипломатияси доирасида қатор қўшма тадбирларни ташкил этиш бўйича келишувга эришилди.
