Ўзбекистон ва Корея бизнеси: саноат-технологик альянс тузиш таклиф қилинди

Шавкат Мирзиёев ва Корея Республикаси Бош вазири Хан Сон Сук Ўзбекистон–Корея қўшма бизнес форумининг очилишида иштирок этди. Тадбирда икки давлатнинг давлат идоралари ва бизнес доираларидан 300 нафардан ортиқ вакил қатнашди.

Форумда етакчи молия институтлари, йирик саноат корхоналари ва савдо компаниялари раҳбарлари, жумладан, Кореянинг “Lotte Chemical”, “Hyundai Motor Group”, “Samsung C&T”, “CJ Group”, “Shinhan Financial Group”, “Hyundai Rotem”, “KIND”, “BOMI”, “Kia Corporation”, “Sampyo Group” ва “Hansae Mobility” каби компаниялари вакиллари иштирок этди.

Президент Шавкат Мирзиёев Кореяни Ўзбекистоннинг вақт синовидан ўтган дўсти ва алоҳида стратегик шериги сифатида қайд этиб, савдо-иқтисодий ҳамда инвестициявий алоқалар икки давлат кўп қиррали ҳамкорлигининг устувор йўналишларидан эканини таъкидлади.

Кореянинг етакчи компаниялари Ўзбекистонда самарали фаолият юритиб, мамлакат иқтисодиётининг ривожига муносиб ҳисса қўшаётгани қайд этилди. Шу билан бирга, Ўзбекистоннинг индустриал ва технологик тараққиётида янги босқич бошланаётгани, бу эса савдо ва инвестицияларни кенгайтириш ҳамда янги қўшма лойиҳаларни амалга ошириш учун қўшимча имкониятлар яратиши таъкидланди.

Давлат раҳбари Ўзбекистоннинг ресурс салоҳияти, Кореянинг илғор технологиялари ва икки мамлакат компанияларининг инвестициявий имкониятларини бирлаштириш орқали янги иқтисодий ўсиш нуқталарини шакллантиришни таклиф этди.

Келгусидаги ҳамкорликнинг устувор йўналишлари сифатида саноат кооперацияси ва тўлиқ ишлаб чиқариш занжирларини яратиш, энергетика ва “яшил иқтисодиёт”, транспорт ҳамда замонавий инфратузилма, рақамлаштириш ва сунъий интеллект, яримўтказгичлар ва микроэлектроника, биотехнология ва фармацевтика, илмий тадқиқотлар, илғор технологияларни жорий этиш ҳамда кадрлар тайёрлаш соҳалари кўрсатиб ўтилди.

Корея компаниялари мисни чуқур қайта ишлаш, электротехника маҳсулотлари ишлаб чиқариш, автомобиль ва электромобиль саноати учун бутловчи қисмларни маҳаллийлаштириш, робототехника ва автоматлаштириш, биотехнология ва фармацевтика, гидроэнергетика, энергия сақлаш тизимлари, энергетика инфратузилмасини модернизация қилиш, транспорт ва шаҳар инфратузилмасини ривожлантириш бўйича лойиҳаларда иштирок этишга таклиф қилинди.

Саноат ва технологик ҳамкорликни янги босқичга олиб чиқиш мақсадида Ўзбекистон–Корея саноат-технологик альянсини ташкил этиш таклифи илгари сурилди.

Президент Ўзбекистонда корейс бизнеси учун янада қулай шарт-шароитлар яратиш ҳамда қўшма лойиҳаларни амалга оширишга амалий кўмак кўрсатишга тайёр эканини билдирди.