Жанубий Корея Марказий Осиё президентларига турли совғалар тақдим этди: улар орасида нималар бор?

Жанубий Корея президенти Ли Жэ Мён 14–16 сентябрь кунлари Сеулда Марказий Осиё давлатлари президентлари билан учрашувлар ўтказиб, уларга турли совғалар тақдим этди. Совғалар давлат раҳбарларининг қизиқишлари ҳамда мамлакатларнинг маданий хусусиятлари ҳисобга олинган ҳолда танланган.

Ўзбекистон президентига — қизил женьшень

Ли Жэ Мён 14 сентябрь куни Шавкат Мирзиёев билан учрашди. Мулоқот якунида Корея президенти давлат раҳбарига мустаҳкам саломатлик ва фаровонлик тилаб, Жанубий Кореянинг премиум саломатлик маҳсулотларидан бири бўлган қизил женьшень совға қилди.

Биринчи хоним Зироат Мирзиёеванинг коллекцион ва антиквар керамикага бўлган қизиқиши инобатга олиниб, унга анъанавий корейс эстетикаси акс эттирилган, кумуш билан безатилган оқ чинни чой сервиси ва унга мос патнис тақдим этилди.

Шунингдек, Ўзбекистон президентининг ташрифи доирасида икки давлат ўртасидаги дўстона муносабатларни акс эттирувчи қатор тадбирлар ташкил этилди. Жумладан, Сеулдаги Lotte World Tower биносида Ўзбекистон ва Жанубий Корея байроқлари намойиш этилди.

Туркманистон президентига — тарихий санъат асари

15 сентябрь куни Туркманистон президенти Сердар Бердимуҳамедов билан учрашувда унга Когурё давридаги Муюнчхон мақбарасида тасвирланган машҳур ов саҳнаси акс этган санъат асари совға қилинди.

Мазкур совға анъанавий чилбо усулида безатилган рамкага жойлаштирилган. Совғани танлашда Туркманистон президентининг от спортига қизиқиши ҳам ҳисобга олинган.

Қозоғистон президентига — стол тенниси ракеткаси ва таэквондо формаси

Қозоғистон президенти Қосим-Жўмарт Тўқаевга унинг стол теннисига қизиқиши ва Қозоғистоннинг келаси йили таэквондо бўйича жаҳон чемпионатига мезбонлик қилиши инобатга олиниб, премиум стол тенниси ракеткалари ва таэквондо формаси тақдим этилди.

Ракеткалар махсус корейс ҳанжи қоғозидан тайёрланган ғилофга жойлаштирилган бўлиб, уларга Тўқаевнинг исми ва икки давлат байроқлари туширилган. Таэквондо формасида ҳам икки давлат байроқлари ҳамда Қозоғистон рамзларидан бири бўлган қор қоплони тасвирланган.

Қирғизистон президентига — гольф паттери ва женьшень

16 сентябрь куни Қирғизистон президенти Садир Жапаров билан учрашувда унга исми ўйиб ёзилган Gold Five премиум брендининг гольф паттери совға қилинди.

Совға танлашда Қирғизистонда 2026 йил июль ойида илк халқаро стандартдаги гольф майдони очилгани ҳисобга олинган.

Бундан ташқари, Садир Жапаровга ҳам мустаҳкам саломатлик тилаб, қизил женьшень тақдим этилди.

Қирғизистон биринчи хоними Ойгул Жапаровага эса анъанавий корейс торли чолғу асбоби шаклидаги декоратив буюм совға қилинди.

Тожикистон президентига — совға мазмуни ошкор қилинмаган

Тожикистон президенти Эмомали Раҳмон учун ҳам Ли Жэ Мён махсус совға тайёрлаган. Бироқ Тожикистон томонининг илтимосига кўра, совға қутисида нима борлиги жамоатчиликка маълум қилинмаган.

Шунингдек, Марказий Осиё давлатлари раҳбарлари Жанубий Корея президентига жавобан қандай совғалар тақдим этгани ҳақида ҳозирча расмий маълумот берилмаган.

Марказий Осиё давлатлари президентлари 16–17 сентябрь кунлари Сеулда бўлиб ўтадиган биринчи Жанубий Корея–Марказий Осиё саммитида иштирок этмоқда.