Дирижабль, фаввора ва осмонўпар бинолардаги байроқ: Шавкат Мирзиёевнинг Кореяга ташрифи тафсилотлари
Президент Шавкат Мирзиёев Кореядаги ташрифи давомида минтақа давлатлари раҳбарлари ва кореялик ҳамкорлар билан учрашди. Саммит арафасида “Мирзиёев доктринаси” китобининг корейс тилидаги нашрига дастхат ёзиб берди.
Президент Шавкат Мирзиёевнинг Жанубий Кореяга давлат ташрифи дўстона учрашув ва мулоқотларга бой бўлди. Биринчи “Марказий Осиё – Корея Республикаси” саммити доирасида давлат раҳбари минтақа мамлакатлари президентлари билан учрашиб, икки томонлама муносабатлар ва ҳамкорликни ривожлантиришнинг истиқболли йўналишларини муҳокама қилди.
Ташриф давомида Президентнинг Корея Республикасининг Ўзбекистондаги собиқ элчиси Ли Ук Хён билан учрашуви ҳам бўлиб ўтди. Суҳбатда Ўзбекистон–Корея дўстона муносабатларини мустаҳкамлаш йўлида ўтган йилларда амалга оширилган ишлар ва ҳамкорлик тажрибаси ёдга олинди.
Саммит арафасида Шавкат Мирзиёев Жанубий Корея Миллий Ассамблеяси Спикери учун корейс тилига таржима қилинган “Мирзиёев доктринаси” китобига дастхат ёзиб берди.
Ташриф доирасида Ўзбекистон ва Жанубий Корея ўртасидаги дўстона муносабатлар ҳамда ўзаро ҳурматни акс эттирувчи қатор тадбирлар ҳам ташкил этилди.
Жумладан, Жанубий Кореядаги энг баланд бино — Lotte World Tower ҳамда Сеул телеминорасида Ўзбекистон байроғи намойиш этилди. Президент ташрифи шарафига Ўзбекистон байроғи рангларидаги дирижабль ҳам парвоз қилди.
Шунингдек, Президент қароргоҳи олдидаги фавворада Ўзбекистон давлат герби ва байроғи тасвирлари акс эттирилди.
Мазкур тадбирлар Жанубий Корея томонининг Ўзбекистон давлат раҳбарининг ташрифига кўрсатган эътибори ва меҳмондўстлигини намоён этди.
