Овқатдан заҳарланиш гумони: Фарғонада 31 киши шифохонага ётқизилди
Гумон қилинаётган озиқ-овқат маҳсулотлари ва беморлардан тегишли намуналар олиниб, лаборатория текширувларига юборилган.

Фарғона вилояти Учкўприк туманида 37 нафар фуқаро ҳолсизлик, кўнгил айниши ва ич кетиши каби шикоятлар билан тиббиёт муассасасига мурожаат қилган. Улардан 31 нафари шифохонага ётқизилган.
Маълум қилинишича, дастлабки эпидемиологик суриштирув давомида 17–18 сентябрь кунлари мурожаат қилган фуқаролар Учкўприк туманидаги Наврўзшоҳ кўчасида жойлашган фаст-фоод шохобчаларидан бирида хот-дог ва нон-бургер истеъмол қилгани аниқланган. Шифокорлар беморларда овқатдан заҳарланиш ҳолати борлигидан гумон қилган.
18 сентябрь соат 17:00 ҳолатига кўра, жами 37 киши тиббий ёрдам сўраб мурожаат қилган, 31 нафари шифохонага ётқизилган. Ҳозирда уларга тиббий ёрдам кўрсатилмоқда.
Ҳолат юзасидан эпидемиологик суриштирув ишлари олиб борилмоқда. Гумон қилинаётган озиқ-овқат маҳсулотлари ва беморлардан тегишли намуналар олиниб, лаборатория текширувларига юборилган.
Шунингдек, мазкур тадбиркорлик субъектининг фаолияти қонунчиликда белгиланган тартибда вақтинча тўхтатилган.








