Истанбулда ўзбекистонлик аёл вафот этди: у доридан заҳарланган
Марҳуманинг жасади Ўзбекистонга олиб келинди.
2026 йил 19 сентябрь куни Истанбул шаҳрида Ўзбекистон фуқароси Мелиева Моҳира фармацевтик воситадан заҳарланиш оқибатида вафот этди. Бу ҳақда Ўзбекистоннинг Истанбулдаги Бош консулхонаси маълум қилди.
Қайд этилишича, марҳума касаллик даврида уй шароитида норасмий шахслар кўмагида даволанган. Даволаниш давомида қабул қилинган дори воситаларининг ножўя таъсири сабаб унинг аҳволи оғирлашган, қонида инфекция ривожланган ва организмида кучли реакция кузатилган.
Шунга қарамай, бемор ўз вақтида шифохонага олиб борилмаган ва уй шароитида даволаниш давом эттирилган.
Аҳволи жиддийлашгач, Мелиева Моҳира дастлаб Мармара шифохонасига олиб борилган. У ерда жонлантириш бўлимига жойлаштириш имкони бўлмагани сабаб бемор Картал туман шифохонасига кўчирилган. Шифокорлар томонидан зарур тиббий муолажалар кўрсатилганига қарамай, унинг ҳаётини сақлаб қолишнинг имкони бўлмаган.
Марҳуманинг жасади Ўзбекистоннинг Истанбулдаги Бош консулхонаси ва Миграция агентлиги ҳамкорлигида Ўзбекистонга олиб келинди.
Бош консулхона Туркияда бўлиб турган Ўзбекистон фуқароларини дори воситаларини шифокор тавсиясисиз қабул қилмаслик, норасмий ва тегишли малакага эга бўлмаган шахслар томонидан даволанишдан сақланишга чақирди.
Шунингдек, соғлиқ ҳолати кескин ёмонлашганида вақтни бой бермасдан расмий тиббиёт муассасаларига мурожаат қилиш зарурлиги таъкидланди.
Бош консулхона марҳуманинг оила аъзолари ва яқинларига ҳамдардлик билдирди.
