Танлаган йўлимиз аниқ — очиқлик, яхши қўшничилик ва мулоқот”: Саида Мирзиёева БМТда нутқ сўзлади
Ўзбекистон Президенти Администрацияси раҳбари Саида Мирзиёева БМТда Афғонистон, Оролбўйи, экология, болалар ҳуқуқлари, сунъий интеллект ва аёллар ҳуқуқларигача бўлган қатор долзарб масалаларга тўхталди.
БМТ Бош Ассамблеясининг 81-сессиясида Ўзбекистоннинг глобал ва минтақавий масалаларга доир позицияси билдирилди. Сессия доирасида Ўзбекистон Президенти Администрацияси раҳбари Саида Мирзиёева нутқ сўзлади.
У ўз нутқида бугунги дунёда зиддиятлар кучайиб, ўзаро ишонч сусайиб бораётган бир шароитда Ўзбекистоннинг танлаган йўли очиқлик, яхши қўшничилик ва мулоқотга асосланишини таъкидлади.
“Танлаган йўлимиз аниқ — очиқлик, яхши қўшничилик ва мулоқот. Биз тинчлик, ҳамкорлик ҳамда инсон қадр-қимматини эъзозлаш тарафдоримиз”, деди Саида Мирзиёева.
Нутқ давомида Марказий Осиёда юз бераётган ўзгаришлар, Ўзбекистоннинг тараққиёт йўли ва аҳолининг турмуш даражасини яхшилаш борасидаги саъй-ҳаракатларга ҳам тўхталиб ўтилди.
Шунингдек, БМТнинг бугунги дунёдаги ўрни, Афғонистон масаласи, болалар ҳуқуқлари ва демографик барқарорлик, Орол фожиаси ва экологик муаммолар, сунъий интеллект тараққиёти, қонун устуворлиги ва аёллар ҳуқуқлари каби масалалар юзасидан фикр билдирилди.
Саида Мирзиёева, шунингдек, Тошкентдаги Ислом цивилизацияси маркази ҳамда инсон қадрини улуғлаш масалаларига эътибор қаратди.
“Бугун ҳеч бир давлат глобал муаммоларни ёлғиз ўзи ҳал эта олмайди. Ўзбекистон ишонч ва ўзаро ҳурматга асосланган келажакни барпо этиш йўлида муносиб ҳиссасини қўшишга доимо тайёр”, деди Президент Администрацияси раҳбари.
