Ўгай қизини ўлдирди: Қашқадарёда 4 ёшли қиз ўгай онаси уриши оқибатида вафот этди
Бош қисмидан жиддий жароҳат олган қизалоқнинг соғлиғи кескин ёмонлашган ва у шу куни ҳаётдан кўз юмган.
Ижтимоий тармоқларда Қашқадарёда ўгай онаси урганлиги оқибатида боланинг вафот этгани ҳақида хабарлар тарқалди. Мазкур ҳолат Болалар омбудсмани томонидан назоратга олинган.
Аниқланишича, 26 сентябрь куни Қашқадарё вилояти Касби туманида яшовчи 1994 йилда туғилган И.С. турмуш ўртоғи, 1988 йилда туғилган Н .А. билан ўзаро низолашган. Можаро вақтида аёл эрининг 2022 йилда туғилган вояга етмаган қизи О.Ш.ни урган.
Бунинг оқибатида қизалоқ бош қисмидан жиддий жароҳат олган. Унинг соғлиғи кескин ёмонлашиб, шу куннинг ўзида вафот этган.
Мазкур ҳолат юзасидан 27 сентябрь куни Касби тумани ИИБ Тергов бўлими томонидан Жиноят кодексининг 126-моддаси 8-қисми «г» банди — оилавий зўравонлик натижасида жабрланувчининг ўлимига сабаб бўлиш ҳолати билан жиноят иши қўзғатилган.
Ҳозирда дастлабки тергов ҳаракатлари олиб борилмоқда. И.С. Жиноят-процессуал кодексининг 221-моддасига асосан гумонланувчи тариқасида процессуал тартибда ушланган.
Қайд этилишича, мазкур жиноят учун Жиноят кодексида 10 йилдан 12 йилгача озодликдан маҳрум қилиш жазоси назарда тутилган.
Болалар омбудсмани боланинг ўлимига сабаб бўлган мазкур жиноят иши юритувини кузатишда давом этади.
Ҳолат юзасидан қўшимча маълумот тақдим этилади.
