Чет элликлар ва дипломатлар Украинада қолмаслиги керак — Россия ТИВ
Россия томони Киевда янги йирик зарбалар хавфи мавжудлигини билдириб, чет элликларни Украинага бормаслик ва мамлакатда қолмасликка чақирди.
Россия Ташқи ишлар вазирлиги вакили Мария Захарова чет элликлар ва дипломатларни Украинани, хусусан, Киевни тарк этишга чақирди.
Захарованинг таъкидлашича, хорижий фуқаролар Украинадаги хавф даражасини ҳисобга олиши ва эҳтимолий провокацияларнинг олдини олиш учун мамлакат ҳудудида қолмаслиги керак.
Россия ТИВ вакили Киевда бўлишни хавфли деб атаб, хорижликларни Украинага сафар қилмасликка ҳам чақирган.
Мазкур баёнот Россия ТИВнинг 3 октябрь куни хорижий фуқаролар ва дипломатик ваколатхоналар ходимларига қилган аввалги огоҳлантиришидан кейин янграган. Ўшанда вазирлик Россия Қуролли кучлари Киев ва бошқа Украина шаҳарларидаги ҳарбий объектларга зарбаларни давом эттиришини билдирган ва чет элликларни Украинада қолмасликка чақирган.
Россия томони ушбу зарбаларни Украина Қуролли кучларининг Россия ҳудудидаги ҳужумларига жавоб сифатида изоҳламоқда. Киев ва Москва уруш давомида бир-бирининг ҳарбий ҳамда стратегик объектларига зарбалар бераётганини маълум қилиб келмоқда.
Сўнгги кунларда Киевга қарши ҳужумлар кучайган. Reuters хабарига кўра, 7 октябрь куни Россия Мудофаа вазирлиги Киев ва Украинанинг бошқа ҳудудларидаги ҳарбий-саноат объектларига кенг кўламли зарбалар берилганини маълум қилган.
Россия ТИВ эса хорижий фуқаролар ва дипломатларни эҳтимолий хавфларни ҳисобга олган ҳолда Украинага бормаслик ва мамлакатни тарк этишга чақирмоқда.
