Кучли таъсир қилувчи дорилар: икки ҳолат фош этилди

Тошкент ва Бухоро вилоятларида кучли таъсир қилувчи моддалар сақлаган дори воситаларининг ноқонуний муомаласи билан боғлиқ ҳолатлар фош этилди.

 

Тошкент шаҳрининг Юнусобод туманида Божхона қўмитасининг Контрабандага қарши курашиш бошқармаси ходимлари ДХХ билан ҳамкорликда тезкор тадбир ўтказган. Унда 47 ёшли фуқаронинг хонадони кўздан кечирилганда, ертўладан қонунга хилоф равишда сақланган 84 та конвалютадаги жами 1176 дона «Регапен» дори воситаси аниқланган.

 

Божхона қўмитаси Марказий божхона лабораториясининг суд-кимёвий экспертизаси натижасида ушбу дорилар таркибида жами 352,5 грамм прегабалин кучли таъсир қилувчи моддаси борлиги тасдиқланган. 

 

Амалдаги тартибга кўра, прегабалиннинг 10 граммдан ортиқ миқдори кўп миқдор ҳисобланиб, жиноий жавобгарликка сабаб бўлади.

 

Бундан ташқари, Бухоро вилоятининг Ғиждувон туманида ўтказилган тезкор тадбирда таркибида габапентин моддаси бўлган 204 дона «Габатен» дори воситасини 1600 долларга сотишга уринган шахс қўлга олинган.

 

Мазкур ҳолатлар юзасидан божхона органлари томонидан жиноят ишлари қўзғатилиб, тергов ҳаракатлари олиб борилмоқда.