Ўзбекистон ва Туркманистон Олий даражадаги стратегик шериклик кенгашини тузади

 

Шавкат Мирзиёев Туркманистон Президенти Сердар Бердимуҳамедов билан учрашув ўтказди.

 

Суҳбат аввалида Шавкат Мирзиёев Сердар Бердимуҳамедовни Туркманистон мустақиллигининг 35 йиллиги, шунингдек, Марказий Осиё ва Озарбайжон давлат раҳбарларининг Маслаҳат учрашувига мезбонлик қилгани ҳамда Мустақил Давлатлар Ҳамдўстлигидаги самарали раислиги билан табриклади.

 

Учрашувда Ўзбекистон ва Туркманистон ўртасидаги стратегик шериклик муносабатларини янада чуқурлаштириш масалалари муҳокама қилинди.

 

Томонлар савдо-иқтисодий ҳамкорликдаги ижобий суръатларни мамнуният билан қайд этди. Йил бошидан буён ўзаро товар айирбошлаш ҳажми барқарор ўсиб бораётгани, “Шовот – Тошовуз” чегараолди савдо зонаси эса муваффақиятли фаолият юритаётгани таъкидланди.

 

Ўзаро савдо ҳажмини бир неча баробар ошириш бўйича чора-тадбирлар режасини қабул қилиш, шунингдек, саноат, энергетика, транспорт, қишлоқ ва сув хўжалиги соҳаларида Кооперация дастурини амалга ошириш муҳимлиги қайд этилди.

 

Мазкур ҳамкорликни икки мамлакат ҳудудлари даражасида ҳам кенгайтириш зарурлиги таъкидланди.

 

Учрашув якунида Ўзбекистон ва Туркманистон ўртасида Олий даражадаги стратегик шериклик кенгашини тузиш тўғрисида битим имзоланди.

 

Ушбу ҳужжат икки давлат ўртасидаги сиёсий мулоқотни янада чуқурлаштириш, шунингдек, устувор йўналишларда амалий ҳамкорликни кенгайтириш учун мустаҳкам институционал асос яратади.