Дарсдан чиқариб, хонага олиб кирган: ўқувчига шилқимлик қилган техникум ходими ишдан олинди
Шунингдек, яна икки ходим ишдан бўшатилиб, уч нафарига ҳайфсан берилган.
Сурхондарё вилояти Жарқўрғон туманида вояга етмаган ўқувчига шилқимлик қилган техникум ходими ишдан бўшатилди. Ҳолат юзасидан ўтказилган хизмат ўрганиши натижасида яна икки раҳбар ва психолог лавозимидан озод этилган, уч нафар ходимга ҳайфсан берилган. Бу ҳақда Касбий таълим агентлиги маълум қилди.
Суд ҳужжатига кўра, ишлаб чиқариш таълими устаси К.Э. ўзига бириктирилган гуруҳда таҳсил олаётган қизни ўқитувчидан рухсат олиб дарсдан чиқарган ва кафедра хонасига олиб кирган. У ерда ўқувчига нисбатан шаҳвоний тусдаги ҳаракатларни содир этган. Қиз қаршилик кўрсатиб, хонадан чиқиб кетган.
Шу куни дарслар тугагач, ходим бошқа рақамдан қўнғироқ қилиб, ўзини бошқа исм билан таништирган ва ўқувчини спорт залига чақирган. Қиз у ерга борганида унга яна шилқимлик қилган.
30 сентябрь куни ўқувчининг отаси ҳолат юзасидан ички ишлар органларига мурожаат қилган. Шундан сўнг Касбий таълим агентлиги томонидан тузилган ишчи гуруҳ техникумда хизмат ўрганишини ўтказган. Унда воқеа сабаблари ҳамда масъул ходимларнинг хизмат вазифаларини қай даражада бажаргани текширилган.
Ўрганиш натижаларига кўра, техникум директорининг ёшлар билан ишлаш бўйича ўринбосари И.Ч. ва психолог Й.К. лавозимидан озод этилган. Ўқув ишлари бўйича директор ўринбосари Д.Т., ишлаб чиқариш таълими бўйича директор ўринбосари Б.У. ҳамда физика фани ўқитувчиси Г.Т.га ҳайфсан берилган. Ўқувчига нисбатан номақбул хатти-ҳаракат содир этган ишлаб чиқариш таълими устаси К.Э. билан тузилган меҳнат шартномаси эса бир томонлама бекор қилинган.
Агентлик мазкур қарорлар қонунчилик талаблари ва таълим тизимида хавфсиз, ҳурматга асосланган муҳитни таъминлашга қаратилган ички буйруқ асосида қабул қилинганини билдирган.
Касбий таълим агентлиги ўқувчиларнинг шаъни, қадр-қиммати ва шахсий дахлсизлигига тажовуз қилувчи ҳар қандай хатти-ҳаракатни қатъий қоралашини маълум қилган. Шунингдек, бундай ҳолатларнинг олдини олиш, ўқувчиларнинг мурожаатларини ўз вақтида ўрганиш ва ҳар бир ҳолатга холис муносабат билдириш бўйича масъул раҳбар ҳамда ходимларнинг жавобгарлигини кучайтириш режалаштирилган
