Трампнинг Ўзбекистонга сафари қачон бўлади? Рубио жавоб берди
Марко Рубионинг айтишича, сафар муддатлари келаси йили кўриб чиқилади.
АҚШ президенти Дональд Трампнинг Ўзбекистонга ташрифи 2027 йилда режалаштирилиши мумкин. Бу ҳақда АҚШ Давлат котиби Марко Рубио Самарқандда журналистларга берган интервьюсида маълум қилди.
Рубионинг таъкидлашича, АҚШ томони ташриф амалга ошишини истайди ва келгуси йилда унинг мумкин бўлган саналарини муҳокама қилишни режалаштирмоқда.
“Биз келгуси йилда бу борада ишлашни ва қайси саналар мос келишини кўриб чиқишни истаймиз. Менимча, имконият бўлса, у ҳақиқатан ҳам келишни хоҳлайди. Унинг ўзи ҳам шундай деган”, — деган Рубио.
Аввалроқ АҚШ президентининг глобал ҳамкорлик бўйича махсус вакили Паоло Замполли ҳам Дональд Трамп Ўзбекистонга келишни хоҳлаётганини билдирган эди. У Америка етакчисининг ташрифини илгари суриб келаётганини ва сафар яқин келажакда амалга ошишига умид қилаётганини айтган.
