Колумбияда ноқонуний олтин кони қулади: 14 киши ҳалок бўлди
Ҳодиса оқибатида яна етти киши жароҳатланган.
Колумбиянинг Нарино департаментидаги Санта-Барбара муниципалитетида ноқонуний олтин конининг қулаши оқибатида камида 14 киши ҳалок бўлди. Яна етти нафар кончи жароҳатланди.
Маҳаллий ОАВ хабарларига кўра, олтин қазиб олиш вақтида юз берган тош кўчиши кончиларни вайроналар остида қолдирган. Ҳодисадан сўнг маҳаллий аҳоли ва қутқарув гуруҳлари жабрланганларга ёрдам бериш ҳамда кончиларни қутқариш учун иш бошлаган.
Колумбиянинг Табиий офатлар хавфини бошқариш миллий бўлими (UNGRD) маълумотига кўра, ҳалок бўлганлар ва жароҳатланганларни вайроналар остидан олиб чиқиш ишларида маҳаллий аҳоли ҳамда қутқарувчилар иштирок этган.
Нарино губернатори Луис Альфонсо Эскобар ҳалок бўлганларнинг яқинларига ҳамдардлик билдириб, фавқулодда вазиятларда инсонлар ҳаётини ҳимоя қилиш ва жабрланган оилаларни қўллаб-қувватлаш муҳимлигини таъкидлади.
Маълумот учун, Колумбияда август ойида ҳам шунга ўхшаш ҳодиса юз бериб, 13 кишининг ҳаётига зомин бўлган эди.
