Ўзбекистонда истеъмол товарлари текшируви: 73 номдаги маҳсулотда камчилик топилди
2026 йилнинг саккиз ойида 60 турдаги 558 номдаги маҳсулот лаборатория экспертизасидан ўтказилди.
Ўзбекистондаги чакана савдо нуқталарида сотилаётган 73 номдаги маҳсулот сифат ва техник талаблар бузилган ҳолда ишлаб чиқарилгани ёки муомалага чиқарилгани аниқланди. Бу ҳақда Рақобат қўмитаси матбуот хизмати хабар берди.
Маълум қилинишича, қўмита ҳамкор ташкилотлар билан биргаликда истеъмол товарларининг сифати ва хавфсизлик талабларига мувофиқлигини текшириш учун мунтазам равишда назорат харидларини амалга оширмоқда. Харид қилинган маҳсулотлар аккредитациядан ўтган лабораторияларда текширилиб, давлат стандартлари ва норматив-техник ҳужжатлар талабларига мувофиқлиги баҳоланади.
Хусусан, 2026 йилнинг дастлабки саккиз ойида 60 турдаги 558 номдаги маҳсулот лаборатория экспертизасидан ўтказилган. Текширувлар натижасида 73 номдаги маҳсулот белгиланган талабларга жавоб бермаслиги аниқланган.
Ушбу маҳсулотларни савдо расталаридан қайтариб олиш ва қонунчиликка мувофиқ чоралар кўриш учун тегишли материаллар Ўзбекистон техник жиҳатдан тартибга солиш агентлиги ҳамда Санитария-эпидемиологик осойишталик ва жамоат саломатлиги қўмитасига юборилган.
Рақобат қўмитаси истеъмолчилар саломатлиги ва ҳуқуқларини ҳимоя қилиш мақсадида назорат харидлари давом эттирилишини маълум қилди.
