“Адашаётган бўлишни истардим”: Вучич учинчи жаҳон уруши хавфи ҳақида огоҳлантирди

Сербиянинг собиқ президенти Александр Вучич Европа давлатларининг ҳарбий салоҳиятини ошириши ва мудофаа саноатига катта маблағ йўналтириши келажакда кенг кўламли уруш хавфини кучайтириши мумкинлигини таъкидлади.

Александр Вучич бу ҳақда журналист Ксения Собчак билан YouTube’да эълон қилинган интервьюсида гапирди.

Унинг фикрича, Европа мамлакатлари мудофаа саноатига катта сармоя киритиб, қурол ишлаб чиқаришни кўпайтирмоқда. Вучич бу жараённи Антон Чехов пьесаларидаги машҳур тамойил билан таққослади: агар саҳнанинг биринчи пардасида қурол осилиб турса, учинчи пардада у албатта ўқ узади.

Сиёсатчи бунга мисол сифатида Германиянинг қурол ишлаб чиқаришни кенгайтираётган Рейнметалл мудофаа компаниясини келтирган.

Учинчи жаҳон уруши бошланиши эҳтимоли ҳақидаги саволга жавоб берар экан, Вучич ўз тахмини нотўғри чиқишига умид қилишини, бироқ вазиятдан хавотирда эканини билдирди.

«Агар адашган бўлсам, мен энг бахтли одам бўлардим. Лекин қўрқаманки, адашмаяпман», — деган у.

Вучич Европа давлатлари ўзларининг ҳарбий салоҳиятини ошираётганини кўрмаслик мумкин эмаслигини таъкидлаган. Унинг қайд этишича, Европа мамлакатлари буни Россиядан ҳимояланиш зарурати билан изоҳламоқда.

Унинг фикрича, Россияга АҚШ, Европа ёки Буюк Британия томонидан бевосита ҳужум уюштирилса, Москва ядровий қурол билан жавоб қайтариши мумкин.

Вучич Россия билан мулоқот қилиш зарурлиги ҳақидаги чақириқлари Европадаги сиёсий мавқеига салбий таъсир кўрсатганини ҳам таъкидлаган.