Испанияда иккита тезюрар поезд тўқнашди: 46 киши ҳалок бўлди

Испаниянинг марказий қисмидаги Толедо провинциясида иккита тезюрар поезд тўқнашиши оқибатида камида 46 киши ҳалок бўлди, 100 дан ортиқ одам жароҳатланди. Бу ҳақда ABC хабар бермоқда.

Ҳодиса 28 октябрь куни маҳаллий вақт билан соат 08:54 да, Урда шаҳри яқинидаги Мадрид–Севилья тезюрар темирйўл линиясида содир бўлган. Дастлабки маълумотларга кўра, Мадрид–Севилья йўналишида ҳаракатланган Renfe компаниясининг AVE поезди рельсда тўхтаб турган Iryo компаниясига тегишли поездга орқадан урилган.

Тўқнашув оқибатида Iryo поездининг тўртта вагони рельсдан чиқиб кетган, улардан камида иккитаси қияликдан пастга қулаган. Ҳалокат вақтида иккала поездда жами 500 дан ортиқ йўловчи бўлган.

Воқеа жойига қутқарувчилар, ўт ўчирувчилар ва тиббиёт ходимлари сафарбар этилган. Жабрланганларни қутқариш ва уларга ёрдам кўрсатиш ишлари давом этмоқда.

Ҳалокат сабабларини аниқлаш юзасидан текширув бошланган. Дастлабки тахминларга кўра, темирйўл ҳаракатини бошқариш тизимидаги носозлик ва инсон омили эҳтимолий сабаблар қаторида кўриб чиқилмоқда. Бироқ ҳодисанинг аниқ сабаби ҳозирча расман тасдиқланмаган.

Авария сабабли Мадрид, Сьюдад-Реал ва Андалусия ўртасидаги тезюрар поездлар қатнови тўхтатилган.

Испания бош вазири Педро Санчес ҳалокатдан чуқур қайғуда эканини билдириб, қурбонлар ва уларнинг яқинларига ҳамдардлик билдирди.