Ўзбекистон билан чегарада янги талаб: Қозоғистон чегарасида навбат банд қилиш пулли бўлади
Белгиланган вақтда кетма-кет икки марта келмаган ташувчиларнинг депозити давлат бюджетига ўтказилади.
2026 йил 9 ноябрдан бошлаб Қозоғистоннинг Ўзбекистон билан чегарасидаги учта назорат-ўтказиш пунктида электрон навбатни банд қилиш учун 20 АЕК, яъни 86 500 тенге миқдорида кафолат пули тўлаш талаб этилади. Бу ҳақда Қозоғистоннинг Туркистон вилояти Давлат даромадлари департаменти маълум қилди.
Янги тартиб халқаро юк ташувчиларга тегишли бўлиб, «Казигурт», «Б. Қонисбаева» ва «Атамекен» назорат-ўтказиш пунктларида амал қилади.
Электрон навбатни банд қилиш учун ташувчининг махсус электрон ҳисобида белгиланган миқдорда маблағ бўлиши керак. Агар транспорт воситаси белгиланган вақтда назорат-ўтказиш пунктига етиб келса, депозит ташувчига автоматик равишда тўлиқ қайтарилади.
Бироқ ташувчи 90 календарь кун ичида белгиланган вақтда кетма-кет икки марта назорат-ўтказиш пунктига келмаса, кафолат пули қайтарилмайди ва давлат бюджетига ўтказилади.
Қозоғистон томони ушбу чора чегара пунктларида сунъий навбатлар пайдо бўлишининг олдини олиш ва халқаро ташувчиларнинг масъулиятини оширишга қаратилганини билдирди.
Маълумот учун, Қозоғистонда 2026 йилда бир ойлик ҳисоблаш индекси 4 325 тенге этиб белгиланган. Шу сабабли 20 АЕК 86 500 тенгега тенг.
