Фарғонадаги фожиа: 24 ёшли йигит 15-қаватдан ўзини ташлади
Йигит аввал руҳий саломатлик марказида бир неча марта даволанган.
Фарғона шаҳрида 24 ёшли фуқаро кўп қаватли уйнинг 15-қаватидан ўзини ташлаши оқибатида вафот этди. Бу ҳақда Бош прокуратура матбуот котиби Ҳаёт Шамсутдинов Zamon.uz'га маълум қилди.
Фарғона шаҳар ИИБ навбатчилик қисмининг 26 октябрь куни 18: 30 лар атрофида берган хабарига кўра, ҳодиса Шаҳарқишлоқ маҳалласидаги Тарона кўчасида жойлашган кўп қаватли уйда содир бўлган.
Ҳодиса жойи тезкор-тергов гуруҳи томонидан кўздан кечирилиб, ишга алоқадор шахслардан тушунтириш хатлари олинган. Дастлабки тиббий маълумотномада ўлим сабаби сифатида жигар ёрилиши кўрсатилган. Ўлим сабабларини аниқлаштириш учун суд-тиббий экспертизаси тайинланган.
Прокуратура маълумотига кўра, ҳодиса жойида жиноят излари ва шубҳали ҳолатлар аниқланмаган. Марҳум фойдаланган «Redmi» русумли телефон текшириш учун далилий ашё сифатида олиб қўйилган.
Қайд этилишича, марҳум аввал шизофрения ташхиси билан Фарғона вилоятидаги ихтисослаштирилган руҳий саломатлик марказида бир неча бор даволанган. У охирги марта 4 июлдан 13 октябргача стационар шароитда даволанган.
Шунингдек, ҳодиса содир бўлган кўп қаватли уйдаги видеокузатув камералари бир неча ойдан бери ишламаётгани аниқланган.
Фарғона шаҳар прокуратураси томонидан терговга қадар текширув ҳаракатлари давом эттирилмоқда. Текширув натижалари бўйича қўшимча маълумот берилиши билдирилган.
