Shahrisabzda YTH: 20 yoshli haydovchi vafot etdi
20 yoshli haydovchi rul boshqaruvini yo‘qotib, уo‘l chetidagi daraxtga urilgan.
Qashqadaryo viloyatining Shahrisabz tumanida VAZ-2105 rusumli avtomobil daraxtga urilishi oqibatida 20 yoshli haydovchi vafot etdi. Bu haqda viloyat Ichki ishlar boshqarmasi Yo‘l harakati xavfsizligi boshqarmasi xabar berdi.
Ma’lum qilinishicha, yo‘l-transport hodisasi 26-oktabr kuni soat 23:30 larda Shahrisabz tumani Katta Novqat mahallasi hududidan o‘tgan mahalliy ahamiyatdagi avtomobil yo‘lida sodir bo‘lgan.
2006-yilda tug‘ilgan M.X. VAZ-2105 rusumli avtomobilni boshqarib ketayotib, rul boshqaruvini yo‘qotgan va yo‘l chetidagi daraxtga urilgan.
Hodisa oqibatida tan jarohatlari olgan haydovchi shifoxonada vafot etgan.
Mazkur holat yuzasidan Shahrisabz tumani Ichki ishlar bo‘limi Tergov bo‘linmasi tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan. Hozirda tergov harakatlari davom etmoqda.
