Хориждаги меҳнат стажи Ўзбекистонда пенсия тайинлашда ҳисобга олинади
Бу йил Қирғизистон, Озарбайжон ва Туркия билан иш стажи ва пенсия ҳуқуқини ўзаро тан олиш бўйича битимлар имзоланган.
Президент Шавкат Мирзиёев хорижда қонуний меҳнат қилаётган фуқароларнинг иш стажини Ўзбекистонда пенсия тайинлашда ҳисобга олиш масаласига эътибор қаратди.
Қайд этилишича, хорижда ишлаётган фуқаролар солиқ билан бирга пенсия бадалларини ҳам тўлайди. Бироқ уларнинг чет элдаги меҳнат стажини ватанга қайтгач ҳисобга олиш масаласи тўлиқ ҳал этилмаган.
Бу йил Қирғизистон, Озарбайжон ва Туркия билан иш стажи ҳамда пенсия ҳуқуқини ўзаро тан олиш бўйича битимлар имзоланган. Эндиликда Германия, Россия, Япония, Жанубий Корея, Болтиқбўйи ва Болқон давлатлари билан ҳам шундай келишувларга эришиш вазифаси қўйилди.
“Уларнинг хориждаги иш стажи ватанга қайтгандан кейин ҳисобга ўтиши, айниқса, пенсия тайинлашда, албатта, инобатга олиниши зарур”, — деди давлат раҳбари.
Мутасаддиларга ушбу давлатлар билан музокараларни жадаллаштириб, йил якунига қадар аниқ натижаларга эришиш топширилди.
