Тошкентда ҳаво сифати яхшиланади: ёғингарчилик кутилмоқда
Ёғингарчилик ҳаводаги PM2.5 ва PM10 заррачалари миқдорини камайтириб, ҳаво сифатининг яхшиланишига ёрдам бериши мумкин.
5 ноябрга ўтар кечаси Тошкент шаҳрида ҳаво сифати яхшиланиши прогноз қилинмоқда. Kечки, тунги ва эрталабки соатларда ҳаво сифати халқаро AQI индекси бўйича асосан «ўртача», айрим вақтларда эса «сезгир гуруҳлар учун носоғлом» даражада бўлади. Миллий ҳаво сифати индекси бўйича кўрсаткич асосан «яшил», қисқа муддатга эса «сариқ» даражада бўлиши кутилмоқда.
Глобал об-ҳаво прогноз моделларига кўра, 5 ноябрга ўтар кечаси 2–6 мм ёғингарчилик кузатилиши мумкин. Бу ҳаводаги PM2.5 ва PM10 майда заррачалари миқдорини камайтириб, ҳаво сифатининг яхшиланишига ёрдам бериши мумкин.
5 ноябрь куни эрталаб халқаро AQI индекси бўйича ҳаво сифати «ўртача», миллий индекс бўйича эса «яшил» даражада бўлиши прогноз қилинмоқда.
Айни пайтда Тошкент шаҳрида атмосфера ҳавоси сифати Махсус комиссия томонидан мунтазам мониторинг қилиб борилмоқда.
