30,1 миллиард рубллик зарар: Украина Россиядаги Оzon омборига ҳужум қилди
Компания айрим буюртмаларни бекор қилади, қолганларини эса бошқа омборлардан етказиб беради.
Украина дронлари Россиянинг Адигейск шаҳридаги Оzon логистика марказига зарба берди. Ҳужум оқибатида омборда ёнғин чиқди. Ходимлар эвакуация қилинди, дастлабки маълумотларга кўра, жабрланганлар йўқ. Бу ҳақда компания маълум қилди, деб ёзади Meduza.
Оzon ҳужумга учраган омбордаги маҳсулотларни сотувдан вақтинча олиб ташлашини, уларни буюртма қилиш имкони бўлмаслигини билдирди. Компания айрим буюртмаларни бекор қилади, қолганларини эса бошқа омборлардан етказиб беради.
Россия Мудофаа вазирлиги 709 та Украина дрони мамлакатнинг 14 та ҳудуди, Қрим, Қора ва Азов денгизлари устида уриб туширилганини билдирган.
Қайд этилишича, Украина Қуролли кучлари август ойидан буён Оzon омборларига ҳужум қилиб келмоқда. Компания 2026 йилнинг учинчи чораги учун молиявий ҳисоботида бундай ҳужумлар оқибатида кўрган зарарини 30,1 миллиард рублга баҳолаган.
