“Ўзгаришларни энг мураккаб жойдан бошлаш учун бордик”: Саида Мирзиёева Қашқадарёдаги наркология муассасасида бўлди
Маҳаллий ва халқаро экспертлар иштирокида наркология тизимини тубдан янгилашга қаратилган махсус дастур ишлаб чиқилиши маълум қилинди.
Саида Мирзиёева Қашқадарё вилояти наркология муассасаси фаолияти билан танишди. У соҳадаги мавжуд муаммоларни ўрганиш ва ўзгаришларни энг мураккаб жойдан бошлаш мақсадида муассасага ташриф буюрганини билдирди.
Саида Мирзиёеванинг таъкидлашича, беморларни даволашда муносиб шароит ва малакали тиббий ёрдам билан бир қаторда, самимий муносабат ва руҳий қўллаб-қувватлаш ҳам муҳим аҳамиятга эга. Ҳеч ким ёрдам сўрашдан қўрқмаслиги ва ўз муаммоси билан ёлғиз қолмаслиги керак.
Саида Мирзиёева касалликларнинг олдини олиш, даволаш ва реабилитация жараёнларини бирлаштирган, турли соҳа мутахассислари ҳамкорликда ишлайдиган тизим яратиш мақсад қилинганини қайд этди.
Шунингдек, маҳаллий ва халқаро экспертлар иштирокида наркология соҳасини тубдан янгилашга қаратилган махсус дастур ишлаб чиқилиши режалаштирилмоқда. Унда инсон қадри ва беморларнинг соғлом ҳаётга қайтишига кўмаклашиш устувор йўналиш бўлади.
