Қирғизистонда энергетик ичимликлар тақиқланиши мумкин: Жапаров ҳукуматга топшириқ берди

 

Қирғизистон президенти Садир Жапаров мамлакатда энергетик ичимликлар ишлаб чиқариш ва импорт қилишни тақиқлаш масаласини кўриб чиқишни таклиф қилди. У Вазирлар Маҳкамасига бир ой ичида ушбу масалани ўрганиш, олти ой ичида эса қонунчилик доирасида тегишли тартибга солиш чораларини кўриш бўйича топшириқ берди.

 

Жапаров бу ҳақда ижтимоий тармоқлардаги саҳифасида ёзди.

 

Унинг сўзларига кўра, ўтказилган таҳлилларга кўра, 2025 йилда Қирғизистонда энергетик ичимликлар ички истеъмоли 54 миллион 199 минг литрни ёки тахминан 129 миллион банкани ташкил этган. 2026 йилнинг биринчи ярмида эса истеъмол ҳажми 36 миллион 83 минг литрга, яъни қарийб 85,9 миллион банкага етган.

 

2025 йилда мамлакатда 25 миллион 263 минг литр энергетик ичимлик ишлаб чиқарилган. Шунингдек, Евроосиё иқтисодий иттифоқига аъзо давлатлардан 28 миллион 430 минг литр, бошқа мамлакатлардан эса 1 миллион 239 минг литр маҳсулот импорт қилинган.

 

Жапаровнинг таъкидлашича, энергетик ичимликларни истеъмол қилиш аста-секин ўрганиб қолишга олиб келиши ва одатга айланиши мумкин. Шу сабабли у касалликлар оқибатларига қарши курашиш билан бирга, уларнинг олдини олишга қаратилган чораларни ҳам кўриш зарурлигини билдирган.

 

Дастлабки ҳисоб-китобларга кўра, энергетик ичимликлар ишлаб чиқариш ёки импорт қилиш тақиқланса, Қирғизистон буджети тўғридан-тўғри ва билвосита солиқлардан тахминан 1,5 миллиард сом (17,15 миллион доллар) даромад йўқотиши мумкин.