Янги йилга тайёргарлик ортидан яширин юк: Наманганда 300 мингдан ортиқ пиротехника аниқланди
10 турдаги пиротехника воситасини ноқонуний олиб киришга уриниш фош этилди.
Наманган вилоятида 301 минг 462 дона пиротехника воситасини Ўзбекистон ҳудудига ноқонуний олиб киришга уриниш фош этилди. Бу ҳақда Божхона қўмитаси хабар берди.
Маълум қилинишича, ҳолат Наманган вилояти божхона бошқармасининг «Учқўрғон» чегара божхона пости ходимлари томонидан Контрабандага қарши курашиш бўлими, ДХХ, ИИБ ва Чегара қўшинлари ҳарбий хизматчилари билан ҳамкорликда аниқланган.
Қўшни давлатдан кириб келган юк автотранспорт воситаси инспекцион кўрик мажмуаси орқали текширилганида, тиркаманинг пол қисми тагига яширилган хорижда ишлаб чиқарилган 10 турдаги жами 301 462 дона пиротехника воситаси аниқланган.
Шунингдек, транспорт воситасидан тегишли ҳужжатлари бўлмаган 140 касетада 700 дона “Стекловидное тело” номли тиббий дори воситаси ҳам топилган.
Ҳозирда мазкур ҳолат юзасидан терговга қадар текширув ҳаракатлари олиб борилмоқда.
