Бекатларда кутиш вақти узаймоқда: Тошкентда автобуслар нега кечикмоқда?

 

Тошкент шаҳрида автобусларни кутиш вақти узайгани ҳамда жамоат транспорти ҳаракати белгиланган интервалларга мувофиқ эмаслиги юзасидан йўловчилар томонидан эътирозлар билдирилмоқда. Тошкент шаҳар транспорт ва йўл-транспорт инфратузилмасини ривожлантириш бош бошқармаси мазкур ҳолатга изоҳ берди.

 

Бошқарма маълумотига кўра, айни вақтда пойтахтнинг Шаҳрисабз, Амир Темур шоҳ кўчаси ҳамда Янги Сергели кўчаларида жамоат транспорти учун алоҳида ажратилган йўлаклар (BRТ)ни ташкил этиш ва капитал таъмирлаш ишлари олиб борилмоқда.

 

Ушбу ишлар доирасида умумий узунлиги 5,09 километр бўлган йўл қисмларида қурилиш-монтаж ишлари амалга оширилмоқда. Жумладан:

• Шаҳрисабз кўчасининг 1 километрлик қисмида;

• Амир Темур шоҳ кўчасининг 2,73 километрлик қисмида. Шундан 1,43 километри биринчи, 1,3 километри эса иккинчи босқични ташкил этади;

• Янги Сергели кўчасининг 1,36 километрлик қисмида.

 

Бошқарма тушунтиришича, қурилиш-монтаж ишлари сабаб айрим йўл участкаларида транспорт воситалари ҳаракатига вақтинчалик чекловлар киритилган. Бу эса пойтахтнинг қатор кўчаларида тирбандликлар ортишига олиб келмоқда.

 

Айниқса, эрталабки ва кечки тиғиз вақтларда транспорт оқимининг кўпайиши автобусларнинг белгиланган ҳаракат жадвали ва интервалларига риоя этишида кечикишларни юзага келтирмоқда. Натижада айрим йўналишларда автобуслар орасидаги ҳаракат оралиғи узайиб, йўловчиларнинг бекатларда кутиш вақти ортмоқда.

 

Бошқарма қайд этишича, қурилиш-монтаж ишлари якунланиб, йўлларда транспорт воситаларининг одатий ҳаракати тиклангач, мавжуд тирбандликлар камаяди. Шундан сўнг автобуслар ҳаракати ҳам белгиланган жадвал асосида барқарорлашади.