Туркиядаги қуролли ҳужум: саккиз киши ҳалок бўлди
Ҳалок бўлганлар орасида икки нафар ўқитувчи ҳам бор.
Туркиянинг Афёнкараҳисар вилоятида содир бўлган қуролли ҳужум оқибатида саккиз киши ҳалок бўлди, яна бир киши оғир жароҳат олди. Ҳодиса юзасидан кенг қамровли тергов ҳаракатлари олиб борилмоқда.
Афёнкараҳисар вилояти губернаторлиги маълумотига кўра, қуролли ҳужум 5 ноябрь, пайшанба куни кечқурун вилоятдаги учта қишлоқда содир бўлган. Қурбонларнинг жасадлари Иҳсание туманидаги Юкаритандир, Кийир ва Аязини қишлоқларидан топилган.
Аnadolu ахборот агентлиги хабар беришича, Юкаритандир қишлоғидаги йўлда ўқотар қуролдан жароҳатланган икки аёл аниқланган. Улар шифохонага олиб кетилганига қарамай, вафот этган. Кийир қишлоғида яна уч кишининг, Аязини қишлоғида эса уч кишининг жасади топилган. Қурбонлар орасида икки нафар ўқитувчи ҳам борлиги хабар қилинган.
Вилоят ҳокимлиги баёнотида ҳужум оқибатида жами саккиз нафар фуқаро ҳалок бўлгани ва бир киши оғир жароҳат олиб, шифохонага ётқизилгани тасдиқланган.
Дастлабки маълумотларга кўра, ҳужумчи насосли милтиқдан фойдаланган ва воқеа жойидан қизил автомобилда қочиб кетган. Шундан сўнг жандармерия ҳужум содир бўлган ҳудудлардаги кириш ва чиқиш йўлларини назоратга олиб, гумондорни қидириш бўйича кенг кўламли операция бошлаган.
Кейинчалик Эскишеҳир вилояти губернаторлиги шаҳарда гумондор қўлга олинганини маълум қилган.
Ҳозирда ҳужумнинг барча тафсилотлари, жумладан, унинг сабаблари ва гумондорнинг мақсадлари аниқланмоқда.
