Тошкентда одам ўғирлашга уриниш: икки киши ушланди
Улар бир фуқарони мажбуран автомашинага ўтқазиб олиб кетган, шунингдек, яна бир кишини электрошокер ёрдамида ҳушсизлантириб бўлса ҳам олиб келиш ҳақида топшириқ олган.
Тошкент шаҳрида буюртма асосида одам ўғирлашга уринишда гумонланган икки нафар шахс қўлга олинди. Улар бир фуқарони автомашинада мажбуран олиб кетган, бироқ жабрланувчи қаршилик кўрсатиб, қочишга муваффақ бўлган. Бу ҳақда Ички ишлар вазирлиги хабар берди.
Маълум қилинишича, фуқаро номаълум шахслар томонидан автомашинада олиб қочилгани ҳақида ҳуқуқни муҳофаза қилувчи органларга мурожаат қилган. Ўтказилган тезкор тадбирлар натижасида ушбу ҳолатга алоқадорликда гумон қилинган икки киши ушланган.
Терговга қадар текширув давомида гумонланувчиларнинг 2003 ва 1998 йилларда Тошкент шаҳрида туғилгани, аввал Жиноят кодексининг 169-моддаси (ўғрилик) билан судлангани аниқланган.
Уларнинг фойдаланишидаги автомобиль кўздан кечирилганда, юкхонасидан ўткир тиғли болта топилган ва процессуал тартибда расмийлаштирилган.
ИИВ маълумотига кўра, гумонланувчиларнинг мобил телефонлари текширилганда, Теlegram орқали буюртмачи билан олиб борилган ёзишмалар аниқланган. Уларда биринчи фуқарони қандай бўлмасин буюртмачининг олдига олиб бориш топшириғи берилгани маълум бўлган.
Бундан ташқари, ёзишмаларда яна бир фуқарони ҳам мажбуран олиб келиш талаби бўлган. Агар у қаршилик кўрсатса, бўйнига электрошокер билан зарба бериб, ҳушсизлантириш эвазига бўлса ҳам манзилга етказиш кўрсатмаси берилгани қайд этилган.
Вазирлик эълон қилган видеода гумонланувчилардан бири электрошокер ҳақидаги гапларни ҳазил тариқасида ёзганини айтган. Бироқ ИИВ маълумотига кўра, улар иккинчи фуқарони ишхонаси олдида қарийб тўрт соат кутган. Унинг хизмат сафарига кетганини билгач, режани бошқа кунга қолдирган.
Ҳолат юзасидан гумонланувчиларга нисбатан Жиноят кодексининг 137-моддаси 2-қисми «б» ва «в» бандлари (оғирлаштирувчи ҳолатларда одам ўғирлаш) билан жиноят иши қўзғатилган.
Ички ишлар вазирлиги фуқароларни товламачилик, зўравонлик ва таҳдид орқали пул талаб қилиш ёки турли хизматларни мажбуран текинга бажартириш ҳолатларига дуч келганда, ички ишлар органларига мурожаат қилишга чақирди. Бундай мурожаатларда фуқаронинг шахси сир сақланиши таъкидланган.
