Буюртма асосида одам ўғирлаш: Тошкентда икки гумонланувчи ушланди
Уларнинг телефонидан яна бир фуқарони электрошокер ёрдамида олиб қочиш режасига оид ёзишмалар топилган.
Тошкент шаҳрида буюртма асосида одам ўғирлашга уринишда гумонланган икки нафар шахс қўлга олинди. Уларнинг телефонларидан яна бир фуқарони мажбуран олиб кетиш режасига оид ёзишмалар ҳам аниқланган. Бу ҳақда Ички ишлар вазирлиги хабар берди.
Маълум қилинишича, ИИВ Тезкор-қидирув департаментига бир фуқаро мурожаат қилиб, номаълум шахслар уни автомобилда олиб қочганини билдирган. Унинг айтишича, қатъий қаршилик кўрсатиши натижасида у гумонланувчилар қўлидан қутулиб қолган.
Мазкур мурожаат асосида ИИВ Тезкор-қидирув департаменти ходимлари томонидан тезкор тадбир ўтказилиб, ҳодисага алоқадорликда гумонланган икки киши қўлга олинган. Улар 2003 ва 1998 йилларда Тошкент шаҳрида туғилган, аввал ўғрилик жинояти учун судланган шахслар экани маълум қилинган.
Гумонланувчиларга тегишли автомобиль юкхонасидан ўткир тиғли болта топилиб, белгиланган тартибда расмийлаштирилган.
Вазирлик маълумотига кўра, суриштирув давомида ушланган шахслар айбловларни тан олган. Уларнинг мобил телефонлари текширилганда, буюртмачи билан Телеграм орқали олиб борилган ёзишмалар аниқланган.
Ёзишмаларда гумонланувчиларга мурожаатчини ҳар қандай йўл билан буюртмачининг олдига олиб бориш топширилгани қайд этилган. Бундан ташқари, улар яна бир фуқарони ҳам мажбуран олиб келиши керак бўлган. Бунинг учун ҳатто унинг бўйнига электрошокер билан зарба бериб, ҳушидан кетказиш орқали олиб кетиш режалаштирилгани ёзишмаларда акс этган.
Маълум қилинишича, гумонланувчилар иккинчи фуқарони ишхонаси олдида қарийб тўрт соат кутган. Бироқ унинг хизмат сафарига кетганини билиб, режани бошқа кунга қолдирган.
Ҳолат юзасидан Жиноят кодексининг 137-моддаси 2-қисми «б» ва «в» бандлари билан жиноят иши қўзғатилган. Ҳозирда иш доирасида тергов ҳаракатлари олиб борилмоқда.
