“Мен қилаётган ишимни яхши кўраман”: Рубио истеъфоси ҳақидаги миш-мишларни рад этди
У ўз ишидан мамнунлигини ва президент учун ишлаш доим режасида бўлганини айтган.
АҚШ Давлат котиби ва Оқ уйнинг миллий хавфсизлик бўйича маслаҳатчиси Марко Рубио Дональд Трамп маъмуриятидан кетишни режалаштираётгани ҳақидаги хабарларни рад этди. У президент учун ишлаш ҳар доим режасида бўлганини ва ҳозирги фаолиятидан мамнунлигини айтган.
Рубио бу ҳақда The New York Times нашрига берган интервьюсида маълум қилган.
«Ростини айтсам, бу миш-мишлар қаердан келаётганини билмайман. Мен қилаётган ишимни яхши кўраман. Бундан ташқари, улар менинг ишдан кетишим ҳақида гапиришганда, доим куламан. Мен: «Аниқ қайси лавозимдан?» деб сўрайман», — деган у.
Суҳбат давомида Давлат котиби 2028 йилги президентлик сайловларида номзод бўлиш эҳтимоли ҳақидаги саволга жавоб беришдан бош тортган.
«Мен энди 2028 йил ҳақида гапирмайман. Шунчаки гапирмайман», — деган Рубио.
Аввалроқ у вице-президент Ж.Д. Вэнс президентликка номзодини қўйишга қарор қилса, уни қўллаб-қувватлашини билдирган эди. 2025 йил июль ойида Рубио Вэнсни 2028 йилги сайловларда Республикачилар партиясидан номзод бўлиш учун «аъло номзод» деб атаган.
АҚШда навбатдаги президентлик сайловлари 2028 йил 7 ноябрда бўлиб ўтиши белгиланган. Янги сайланган президентнинг инаугурацияси эса 2029 йил 20 январда ўтказилади.
