20 миллион долларгача мукофот: АҚШ Эрон ядровий дастури ҳақида маълумот изламоқда
Мукофот Эроннинг ядровий объектлари, ускуналари, уларнинг жойлашуви ва тегишли ходимлар ҳақидаги маълумотлар учун берилади.
АҚШ Давлат департаменти Эроннинг ядровий дастури ҳақида муҳим маълумот тақдим этган шахсларга 20 миллион долларгача мукофот берилишини эълон қилди.
Мукофот Давлат департаментининг «Адолат учун мукофотлар» дастури доирасида таклиф этилмоқда. У Эроннинг ядровий дастурига тегишли объектлар ва ускуналар, уларнинг жойлашуви ҳамда кўчирилиши, шунингдек, ушбу фаолиятга алоқадор ходимлар ҳақидаги маълумотларни қамраб олади.
Департамент баёнотида Халқаро атом энергияси агентлиги (МАГАТЭ) 2025 йилда Эрон уранни 60 фоизгача бойитганини қайд этгани айтилган. Бу ядровий қурол ишлаб чиқариш учун зарур деб ҳисобланадиган 90 фоизлик даражадан паст.
АҚШ Давлат департаментининг таъкидлашича, Эрон ядровий қуролга эга бўлмаган давлатлар орасида уранни бундай юқори даражада бойитаётган ягона мамлакат ҳисобланади. Баёнотда мутахассислар бойитиш жараёни давом этса, мавжуд миқдор бир нечта ядровий қурол учун етарли бўлиши мумкинлигини билдиргани ҳам қайд этилган.
Шунингдек, АҚШ томони Эроннинг МАГАТЭ кафолатлари бўйича мажбуриятларига риоя қилмаслиги агентликнинг центрифугалар каби муҳим компонентларнинг ишлаб чиқарилиши ва захиралари ҳақидаги маълумотлар узлуксизлигини йўқотишига сабаб бўлганини таъкидлаган.
Эрон эса ядровий қурол яратишга интилмаслигини бир неча бор билдирган. Теҳрон Ядро қуролини тарқатмаслик тўғрисидаги шартномага содиқлигини таъкидлаб келади. АҚШ эса Эронни ўз халқаро мажбуриятларини бузишда айблаб келмоқда.
