АҚШ Қешм оролига зарба берди: Эрон ҳаво мудофааси нишонга олинган
Дастлабки маълумотларга кўра, оролга иккита ракета тушган.
АҚШ кучлари Ҳурмуз бўғозидаги Эроннинг Қешм оролида жойлашган зенит-ракета иншоотига зарба берди. Бу ҳақда АҚШ президенти Дональд Трамп Флоридада журналистлар билан учрашув чоғида маълум қилган.
Трампнинг айтишича, зарба 6 ноябрь куни кечқурун берилган ва натижада Эроннинг ҳаво мудофаасига тегишли объект йўқ қилинган.
«Мен бу ҳақда гапиришни истамайман. Биз кичик зарбалар бермоқдамиз, аммо улар самарали. Улар у ерга кичик зенит қуролини ўрнатдилар ва биз уни тахминан 15 дақиқада, эҳтимол беш дақиқада йўқ қилдик», — деган АҚШ президенти.
Эрон ОАВлари тунда Қешм оролида бир нечта портлаш содир бўлганини хабар қилган. Tasnim агентлигининг дастлабки маълумотларига кўра, оролга иккита ракета тушган.
Тахминан бир соат ўтиб, Эрон армияси матбуот хизмати Қешм ороли осмонида Американинг MQ-9 дрони тутиб олинганини маълум қилган. Эрон томонининг билдиришича, ҳодиса оқибатида ҳеч ким жабрланмаган ва зарар етмаган.
Axios нашрининг қайд этишича, АҚШнинг зарбаси Қешм оролидан Америка ҳарбий-ҳаво кучлари қирувчи самолётига ракета учирилганидан кейин амалга оширилган.
Эслатиб ўтамиз, аввалроқ Fox News АҚШ 9 ноябрь куни Эронга қарши ҳарбий ҳаракатларни қайта бошлаш имкониятини кўриб чиқаётгани ҳақида хабар берган эди.
