Путин Украина бўйича музокаралар санасини тасдиқлади: уч томонлама учрашув БААда ўтади
Музокараларда ҳудудий масалалар, хавфсизлик кафолатлари ва гуманитар операциялар муҳокама қилиниши кутилмоқда.
Россия президенти Владимир Путин Россия, АҚШ ва Украина делегациялари ўртасидаги уч томонлама музокаралар 10 ноябрь куни Бирлашган Араб Амирликларида бошланишини тасдиқлади. Учрашув Абу-Дабида бўлиб ўтиши режалаштирилган.
“Кейинги ҳафта, сешанба куни Бирлашган Араб Амирликларида Украина масаласи бўйича уч томонлама музокаралар бошланиши режалаштирилган”, — деди Путин Хавфсизлик кенгашининг доимий аъзолари билан ўтказилган йиғилишда.
Россия президенти музокараларни ташкил этишда кўрсатган ёрдами учун БАА раҳбариятига миннатдорлик билдирган. Шунингдек, учрашувда иштирок этадиган Россия вакилларини олдиндан таклиф қилганини маълум қилган.
Россия делегациясига президент ёрдамчиси Владимир Мединский бошчилик қилиши кутилмоқда. Музокараларга, шунингдек, ташқи ишлар вазирлари ўринбосарлари, Россия Қуролли кучлари Бош штаби вакиллари жалб этилган.
Россия президенти матбуот котиби Дмитрий Песков ва АҚШ президентининг махсус вакили Стивен Уиткоффнинг маълум қилишича, музокаралар 10–11 ноябрь кунлари давом этиши кутилмоқда.
Учрашув кун тартибидан ҳудудий масалалар, ён беришлар, урушдан кейинги хавфсизлик кафолатлари ва гуманитар операциялар ўрин олиши мумкин.
