Тўртта вагон аланга ичида қолди: Ҳиндистонда поезд ёниб кетди
Вагонлардан биридаги вентиляторда қисқа туташув юзага келгани ёнғинга сабаб бўлган бўлиши мумкин.
Ҳиндистоннинг Панжоб штатида Karmabhoomi Express тезюрар йўловчи поездининг тўртта вагонида ёнғин содир бўлди. Ҳодиса вақтида поезд Амритсар томон ҳаракатланаётган бўлган. Бу ҳақда The New Indian Express хабар берди.
Маълумотларга кўра, ёнғин Sarai Banjara темир йўл станцияси яқинида юз берган. Ёнғин аниқлангач, хавфсизлик тизими ишга туширилган ва поезд зудлик билан тўхтатилган. Йўловчилар вагонларни тарк этишга мажбур бўлган, айримлари эса ҳаракатланаётган поезддан сакраб тушган.
Воқеа жойига полиция ва ўт ўчириш хизмати ходимлари етиб келиб, ёнғинни ўчириш ишларини бошлаган. Шимолий темир йўлнинг жамоатчилик билан алоқалар бўлими бошлиғи Ҳиманшу Шекҳар Упадҳяйнинг айтишича, тегишли хизматлар ҳодиса жойида иш олиб борган.
Амбала темир йўл бўлими бошлиғи Винод Кумар Бхатия нашрга берган маълумотида ҳодиса оқибатида жабрланганлар ёки ҳалок бўлганлар ҳақида хабар келиб тушмаганини билдирган.
Маълум қилинишича, ёнғин вагонлардан биридаги вентиляторда юзага келган қисқа туташув сабабли бошланган бўлиши мумкин.
Ҳозирча ҳодисанинг барча тафсилотлари ва ёнғин оқибатларига оид қўшимча маълумотлар келтирилмаган.
