12 нафар блогер реклама қонунчилигини бузган: уларга маъмурий чора қўлланилди
Рақобат қўмитаси мониторингида 110 нафар блогернинг саҳифалари кузатилмоқда.
Рақобат қўмитаси ижтимоий тармоқларда жойлаштирилаётган реклама материалларининг “Реклама тўғрисида”ги қонун талабларига мувофиқлигини мониторинг қилиб бормоқда. Текширувлар давомида 12 нафар блогер томонидан қонунчилик талабларига зид реклама ахборотлари жойлаштирилгани аниқланган.
Қўмита томонидан ижтимоий тармоқларда фаолият юритаётган 110 нафар блогер рўйхати шакллантирилган. Уларнинг саҳифаларида эълон қилинаётган реклама материаллари ҳар куни мониторинг қилинмоқда.
Аниқланган қонунбузилишлар юзасидан 12 нафар блогерга нисбатан қонунчиликда белгиланган тартибда маъмурий жавобгарлик чоралари қўлланилган.
Шунингдек, республикада кенг жамоатчиликка танилган қўшиқчилар, актёр ва актрисалар ҳамда спортчилар рўйхати шакллантирилиб, уларнинг ижтимоий тармоқлардаги реклама билан боғлиқ чиқишлари ҳам мунтазам кузатиб борилмоқда.
Рақобат қўмитаси реклама берувчилар, реклама тайёрловчилар ва тарқатувчилар, шу жумладан, блогерлар ҳамда машҳур шахсларни реклама материалларини жойлаштиришда “Реклама тўғрисида”ги қонун талабларига қатъий риоя қилишга чақирди.
Қўмита рекламада ҳақиқий ва ишончли маълумот бериш, истеъмолчиларни чалғитадиган ёки товар ва хизматлар ҳақида нотўғри тасаввур уйғотадиган ахборотларни тарқатмаслик ҳар бир реклама иштирокчисининг масъулияти эканини таъкидлади.
Қонунчилик талабларини билмаслик ёки уларга эътиборсизлик билан муносабатда бўлиш жавобгарликдан озод этмайди. Қўмита ижтимоий тармоқлардаги рекламалар мониторингини кучайтириш ва истеъмолчилар ҳуқуқларини ҳимоя қилишга қаратилган ишларни давом эттиради.
