“Мавжуд имкониятларга нисбатан кам”: Президент электротехника саноатини жадал ривожлантириш зарурлигини таъкидлади

 

Шавкат Мирзиёев электротехника саноати вакиллари, соҳада фаолият юритаётган тадбиркорлар ва инвесторлар билан мулоқот ўтказмоқда.

 

Учрашувда қайд этилишича, кейинги ўн йилда электротехника саноатига 2 миллиард доллар инвестиция киритилиб, 413 та янги ишлаб чиқариш қуввати ишга туширилган. Натижада маиший техника, қуёш панеллари, электрон ҳисоблагичлар ва юқори кучланишли трансформаторлар каби 100 дан ортиқ турдаги янги маҳсулотларни ишлаб чиқариш йўлга қўйилган.

 

Жорий йилда соҳада маҳсулот ишлаб чиқариш ҳажми 50 триллион сўмга етган. Таққослаш учун, 2016 йилда бу кўрсаткич 1,7 триллион сўмни ташкил этган. Инвестициялар ҳажми 600 миллион долларга, экспорт эса 1 миллиард 600 миллион долларга етказилган. Ўтган даврда экспорт 14 баробар ўсган.

 

Давлат раҳбари эришилган натижалар мавжуд имкониятларга нисбатан кам эканини таъкидлаб, электротехника саноатини янада жадал ривожлантириш зарурлигини қайд этди.

 

Саноатнинг асосий хомашёларидан бири бўлган мис ишлаб чиқаришни кўпайтиришга ҳам алоҳида эътибор қаратилмоқда. Жорий йилда 3-мис бойитиш фабрикаси ишга туширилди. Ушбу лойиҳа ҳисобига мис ишлаб чиқариш ҳажмини 300 минг тоннага, 2030 йилга бориб эса 500 минг тоннага етказиш режалаштирилган.

 

Шунингдек, мамлакатда қуёш ва шамол электр станциялари, энергия сақлаш қувватлари барпо этилмоқда, ҳудудларда кенг кўламли қурилиш ишлари олиб борилмоқда. Келгуси ўн йилда ҳамкорлар билан 450 миллиард долларлик лойиҳаларни амалга ошириш мақсад қилинган.

 

Таъкидланишича, бу электротехника маҳсулотлари учун улкан ва узоқ муддатли бозорни шакллантиради. Ўзбекистонда мис ва муҳим минераллар захиралари, салоҳиятли ёшлар, тажрибали тадбиркорлар ҳамда ҳамкорликка тайёр инвесторлар мавжуд. Эндиликда ушбу имкониятларни янги технологиялар ва ишланмалар билан бирлаштириш муҳимлиги қайд этилди.