Жиноятчиликни олдиндан прогноз қилиш тизими жорий этилади: дастлаб қаерда синовдан ўтади?
Жиноятларнинг сабаблари, масъул идоралар ва кўрилган чоралар натижалари ягона электрон платформада назорат қилинади.
Ўзбекистонда криминоген вазият барқарорлигини таъминлаш учун Ягона криминоген маълумотлар платформаси ишлаб чиқилади. Тизим орқали жиноятларнинг сабаблари, масъул идоралар ва уларни бартараф этиш чоралари электрон тарзда назорат қилинади. Бу ҳақда 2026 йил 6 ноябрда қабул қилинган Президентнинг ПФ–241-сон фармонида белгиланган.
Фармонга мувофиқ, платформада жиноятларнинг объектив ва субъектив сабаблари, масъул идоралар ҳамда мансабдор шахслар, шунингдек, ҳуқуқбузарликларнинг олдини олиш ва уларни бартараф этиш чоралари бўйича электрон реестр юритилади.
Кўрилган чоралар натижалари инсон омилисиз ойлик, ярим йиллик ва йиллик тартибда назорат қилинади.
Шунингдек, ҳудудлар, маҳаллалар ва жиноят турлари кесимида жиноятчилик динамикаси ярим йиллик ҳамда йиллик даврлар учун прогноз қилинади. Натижаларга кўра, криминоген вазияти оғир ҳудудларга вазиятни барқарорлаштириш чораларини назарда тутувчи хабарномалар юборилади.
2027 йил якунига қадар платформани Тошкент шаҳрининг Олмазор туманида синов тариқасида ишга тушириш режалаштирилган. 2028 йилдан бошлаб эса уни республиканинг барча ҳудудларига босқичма-босқич жорий этиш чоралари кўрилади.
Фармонда ҳар йили аҳоли ўртасида миллий виктимологик сўров, аҳолининг хавфсизлик ҳисси ва ҳуқуқни муҳофаза қилувчи органларга ишончи бўйича ижтимоий сўровлар ўтказиш ҳам белгиланган.
Бундан ташқари, ёшлар, вояга етмаганлар, аёллар, муқаддам судланган ва пробация ҳисобидаги шахслар, «қизил» тоифадаги маҳаллалар ҳамда бошқа йўналишлар бўйича манзилли криминологик тадқиқотлар ташкил этилади.
