5 минг долларлик иш ваъдаси: Қорақалпоғистонда гумонланувчи ушланди
У фуқарони ҳамшираликка ишга жойлаштириш эвазига пул талаб қилган.
Қорақалпоғистон Республикасининг Қўнғирот туманида фуқарони ишга жойлаштириб қўйиш эвазига 5 минг доллар талаб қилган шахс қўлга олинди. Бу ҳақда ИИВ ахборот хизмати хабар берди.
Маълум қилинишича, туманда яшовчи фуқаро ҳуқуқни муҳофаза қилувчи органларга мурожаат қилиб, танишлари орқали Қўнғирот локомотив депосидаги бўш ҳамшира лавозимига ишга киритиб қўйишни ваъда қилган шахс ундан 5 минг доллар сўраётганини билдирган. Гумонланувчи пулнинг 2 500 долларини олдиндан беришни талаб қилган.
Ўтказилган тезкор тадбир давомида Қўнғирот минтақавий темир йўлида ишловчи, 2002 йилда туғилган фуқаро келишилган сумманинг ярмини олаётган вақтида холислар иштирокида ашёвий далиллар билан ушланган.
Мазкур ҳолат юзасидан унга нисбатан Жиноят кодексининг 168-моддаси (фирибгарлик) ҳамда 211-моддаси (пора бериш) билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
