Зиёратчиларни алдаб пул олиш: ноқонуний “Умра” сафарини ташкил этмоқчи бўлганлар ушланди
Самарқанд ва Гулистонда тегишли рухсатномасиз сафарларини ташкил этишга уринган шахсларга чора кўрилди.
Ўзбекистонда лицензиясиз «Умра» зиёратини ташкил этишга уриниш билан боғлиқ икки ҳолат фош этилди. Самарқанд ва Гулистонда фуқароларни Саудия Арабистонига юбориш эвазига пул олган шахслар ушланди. Ҳар икки ҳолат юзасидан жиноят ишлари қўзғатилган.
Хусусан, Самарқанд шаҳрида ички туризм соҳасида фаолият юритувчи сайёҳлик фирмаси ходими тегишли лицензия ва рухсатномага эга бўлмаган ҳолда, уч нафар фуқарони «Умра» зиёратига юборишни ваъда қилган. Бунинг эвазига ҳар бир фуқародан 1 200 доллардан, жами 3 600 доллар талаб қилган.
ДХХ Самарқанд вилояти бошқармаси ҳамда вилоят ИИБ ходимлари ҳамкорлигида ўтказилган тезкор тадбирда у 3 600 долларни олаётган вақтида ашёвий далиллар билан ушланган.
Шунга ўхшаш ҳолат Гулистон шаҳрида ҳам аниқланган. 1974 йилда туғилган шахс Тошкент шаҳрида фаолият юритувчи турфирма орқали уч нафар фуқарони диний амалларни бажариш учун Саудия Арабистонига ноқонуний юборишни ваъда қилган. У жами 3 300 доллар ва 1,2 миллион сўмни олаётган вақтида ДХХ Сирдарё вилояти бошқармаси ҳамда ИЖҚКД вилоят бошқармаси ходимлари томонидан ушланган.
Ҳозирда ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.
