Электротехника ишлаб чиқарувчилари халқаро молия бозорига чиқмоқда: корхоналарга 50 минг долларгача компенсация берилади
Европа тикланиш ва тараққиёт банки саноат корхоналарига 2–3 миллиард доллар ресурс ажратишга тайёр.
Ўзбекистоннинг бешта маҳаллий электротехника корхонаси ўз лойиҳаларини молиялаштириш учун Европа тикланиш ва тараққиёт банкидан жами 80 миллион доллар жалб қилди.
Жумладан, Тошкент шаҳридаги «Артикул Азия» ва «Макскоппер», Тошкент вилоятидаги «Техно Кабель Групп» ва «Вадес Групп», шунингдек, Андижондаги «Андижон кабель» корхоналари халқаро молия институти билан тўғридан-тўғри ҳамкорликни йўлга қўйган.
Мазкур тажрибани кенгайтириш ва бошқа ишлаб чиқарувчиларни ҳам халқаро молия бозори билан ишлашга тайёрлаш зарурлиги қайд этилди.
Европа тикланиш ва тараққиёт банки саноат корхоналари учун 2–3 миллиард доллар миқдорида ресурс ажратишга, шунингдек, уларнинг фаолиятини баҳолаш харажатларининг бир қисмини қоплашга тайёр.
Қолган харажатлар, жумладан, халқаро консультантларни жалб этиш билан боғлиқ сарфлар давлат томонидан қопланади. Бу мақсадда Савдони ривожлантириш компанияси ҳисобидан ҳар бир корхонага 50 минг долларгача компенсация ажратилиши белгиланди.
