Ўзбекистонда янги техникум ташкил этилади: қутқарувчилар тайёрланади
Муассаса 2027/2028-ўқув йилидан фаолият бошлайди. Унда мактаб битирувчилари давлат гранти ва контракт асосида таҳсил олиши мумкин.
Ўзбекистонда Фавқулодда вазиятлар вазирлиги академияси ҳузурида Қутқарувчиларни тайёрлаш техникуми ташкил этилади. Муассаса 2027/2028-ўқув йилидан фаолият бошлайди. Бу ҳақда 6 ноябрь куни қабул қилинган ҳукумат қарорида белгиланган.
Техникумга умумий ўрта таълим муассасалари битирувчилари давлат гранти ва тўлов-контракт асосида қабул қилинади. Таълим жараёни бошланғич, ўрта ва ўрта махсус касбий таълим дастурлари асосида ташкил этилади.
2029 йилдан бошлаб техникумнинг касбий таълим йўналишларини тамомлаган битирувчилар орасидан фавқулодда вазиятлар органлари учун кадрлар захираси шакллантирилади.
Муассасанинг асосий вазифаларидан бири замонавий назарий билим ва амалий кўникмаларга эга қутқарувчиларни тайёрлашдан иборат. Бунинг учун ўқув жараёнида симуляция, имитация ва виртуал лабораториялар ҳамда полигонлардан фойдаланиш режалаштирилган.
