Андижонда Қирғизистон бош консуллиги очилади: учта вилоятга хизмат кўрсатади
Фармон расмий эълон қилинган кундан 10 кун ўтгач кучга киради.
Қирғизистоннинг Андижон шаҳрида бош консуллиги очилади. Мамлакат президенти Садир Жапаров тегишли фармонни имзолади. Бу ҳақда Kaktus.media хабар берди.
373-сонли фармонга мувофиқ, янги консулликнинг фаолият ҳудуди Ўзбекистоннинг Андижон, Фарғона ва Наманган вилоятларини қамраб олади.
Қайд этилишича, бош консулликни очишдан мақсад Қирғизистон фуқароларининг ҳуқуқлари ва қонуний манфаатларини ҳимоя қилиш, улар учун қулай шароит яратиш ҳамда консуллик хизматларини кўрсатишдан иборат.
Шунингдек, қарор икки давлат ўртасидаги иқтисодий ва маданий ҳамкорликни кенгайтиришга ҳам хизмат қилиши кўзда тутилган.
Фармон расмий эълон қилинган кундан 10 кун ўтгач, яъни 20 ноябрдан кучга киради.
