5 ёшли қизнинг зўрланиши: иш судга оширилди
Жабрланувчи вояга етмаганлиги сабабли суд мажлиси ёпиқ тарзда ўтказилади.
Наманган вилоятининг Учқўрғон туманидаги давлат мактабгача таълим ташкилотларидан бирида 5 ёшли тарбияланувчига нисбатан содир этилган жинсий зўравонлик юзасидан қўзғатилган жиноят иши судга юборилди.
Наманган вилояти судлари матбуот хизматининг маълум қилишича, 52 ёшли M.K. ва бошқа шахсларга нисбатан қўзғатилган жиноят иши жиноят ишлари бўйича Норин туман судининг иш юритувига келиб тушган.
Суд ажримига асосан, иш 18 ноябрь куни кўриб чиқиш учун тайинланган. Жабрланувчи вояга етмаганлиги сабабли суд муҳокамаси Жиноят-процессуал кодексининг 19-моддасида белгиланган тартибда ёпиқ мажлисда ўтказилади.
Эслатиб ўтамиз, мазкур ҳолат юзасидан 12 сентябрь куни Учқўрғон тумани ИИБ тергов бўлинмаси томонидан Жиноят кодексининг 118-моддаси 4-қисми билан жиноят иши қўзғатилган. Гумонланувчи K.M. шу куннинг ўзида процессуал тартибда ушланган ва унга нисбатан қамоққа олиш эҳтиёт чораси қўлланган.
Болалар омбудсмани аввалроқ ҳолат юзасидан дастлабки тергов ҳаракатлари олиб борилаётганини маълум қилган эди.
Суд жараёни якунланганидан сўнг иш бўйича қўшимча маълумот қонунчиликда белгиланган тартибда тақдим этилади.
