Россияда мигрант оилаларига янги талаб: ишламайдиган оила аъзолари учун солиқ жорий этилади
Ушбу чора мигрантларнинг ишламайдиган яқинлари Россияда қолишини чеклашга қаратилган.
Россияда меҳнат фаолияти билан шуғулланаётган чет эл фуқаролари 2027 йил 1 январдан бошлаб мамлакатда яшаётган, бироқ ишламайдиган оила аъзолари учун ҳам солиқ тўлаши керак бўлади. Ушбу чора мигрантларнинг ишламайдиган оила аъзолари Россияда қолишини чеклашга қаратилган.
Бу ҳақда Россия президенти Владимир Путинга ички ишлар вазирининг биринчи ўринбосари, чет эл фуқароларини рўйхатга олиш ва фуқаролик масалалари бўйича хизмат раҳбари Андрей Кикот маълум қилди.
Кикотнинг айтишича, мигрантлар фарзандларини мактабларга қабул қилиш учун белгиланган янги талаблар натижасида ишламайдиган оила аъзолари сони 20 фоизга камайган. Аввал бу кўрсаткич 1,7 миллион кишини ташкил этган.
Шунингдек, Россия хорижий ишчиларни уюшган тарзда жалб этишни режалаштирмоқда. Тегишли қонун лойиҳаси ҳозирда ҳукумат томонидан кўриб чиқилмоқда.
Таклиф этилаётган тартибга кўра, иш берувчи миграция хизматига хорижий ишчи кучига эҳтиёж борлиги ҳақида буюртма беради. Махсус оператор эса ишчиларни танлаб, Россияга олиб келади. Меҳнат шартномаси муддати тугагач, мигрант ўз ватанига қайтиши керак бўлади.
Бунда йирик ва ўрта бизнес вакиллари жалб этилган ишчиларни турар жой ҳамда иш жойига бориш учун транспорт билан таъминлаши шарт бўлади.
