Бирида 2,5 минг, бошқасида 4,4 минг доллар: ноқонуний “Умра” ташкилотчилари аниқланди

 

Фарғона ва Андижон вилоятларида «Умра» зиёратига боришни истаган фуқароларнинг ишончидан фойдаланиб, ноқонуний равишда пул талаб қилган шахслар аниқланди.

 

Маълум қилинишича, Фарғона шаҳрида фаолият юритувчи сайёҳлик фирмасининг норасмий ишчиси тегишли рухсатномага эга бўлмаган ҳолда икки нафар фуқарони Саудия Арабистонига «Умра» зиёратига юбориш эвазига 2 500 АҚШ доллари талаб қилган.

 

Давлат хавфсизлик хизмати ва Ички ишлар вазирлигининг ҳудудий бошқармалари ходимлари ҳамкорлигида ўтказилган тезкор тадбирда у 2 450 АҚШ долларини олаётган вақтида ашёвий далиллар билан ушланган. Ҳолат юзасидан унга нисбатан жиноят иши қўзғатилиб, тергов ҳаракатлари олиб борилмоқда.

 

Шунга ўхшаш ҳолат Андижон вилоятининг Шаҳрихон туманида ҳам қайд этилган. Бу ерда ноқонуний фаолият юритаётган туристик фирма ходими тўрт нафар фуқарони «Умра» зиёратига юбориш эвазига 4 400 АҚШ доллари талаб қилган.

 

ДХХ Андижон вилояти бошқармаси ҳамда вилоят Ички ишлар бошқармаси ходимлари ҳамкорлигида ўтказилган тезкор тадбирда у отаси билан биргаликда 4 300 АҚШ долларини олаётган вақтида ушланган.

 

Ҳозирда ҳолат юзасидан терговга қадар текширув ҳаракатлари олиб борилмоқда.