Нью-Йоркда уч қаватли бино қулаб тушди: 2 киши ҳалок бўлди
Қутқарувчилар вайроналар остида бошқа қурбонлар бор-йўқлигини текширмоқда.
АҚШнинг Нью-Йорк шаҳри Бруклин туманидаги Флатбуш маҳалласида уч қаватли бинoнинг қулаши оқибатида икки киши ҳалок бўлди. Бу ҳақда Reuters хабар берди.
Нью-Йорк шаҳар ёнғин хизмати комиссари Лиллиан Бонсигноренинг матбуот анжуманида маълум қилишича, жароҳатланганларнинг етти нафари болалардир. Ҳодиса оқибатида жами 19 киши жабрланган, улар орасида бир нафар ўт ўчирувчи ҳам бор. Унинг жароҳати енгил экани айтилмоқда.
Жароҳатланганлардан 12 нафарининг аҳволи барқарор, тўрт нафари эса оғир аҳволда. Қутқарув ишлари давом этмоқда.
Нью-Йорк шаҳар ёнғин хизмати бошлиғи Жон Эспозитонинг айтишича, қидирув-қутқарув ишлари ва вайроналарни тозалаш бир неча кун давом этиши мумкин. Жараён бинoнинг беқарор ҳолати ҳамда қўшни иншоотнинг қайта қулаш хавфи сабаб мураккаблашган.
Эспозито вазиятни ўта беқарор деб баҳолаб, қутқарувчилар вайроналар остида бошқа қурбонлар бор-йўқлигини аниқламагунича ҳодиса жойида қолишини таъкидлади.
Маълумотларга кўра, бино 11 ноябрь куни тушдан кейин қулаган. Ёнғин хизматига маҳаллий вақт билан соат 16:01 да хабар келиб тушган ва воқеа жойига ихтисослашган қутқарув гуруҳлари юборилган.
