Марказий Осиёда биринчи: Шавкат Мирзиёев дунёнинг энг нуфузли мусулмонлари рейтингидан ўрин олди
Ўзбекистон раҳбари рейтингда 40-ўринни эгаллади ва бу Марказий Осиё давлатлари орасидаги энг юқори натижа бўлди.
Қироллик Ислом стратегик тадқиқотлар маркази (RISSC) 2027 йил учун дунёнинг энг нуфузли 500 нафар мусулмони рўйхатини эълон қилди. Унда Ўзбекистон президенти Шавкат Мирзиёев 40-ўриндан жой олди. Бу Марказий Осиё мамлакатлари орасидаги энг юқори натижа ҳисобланади.
Рейтингни тузувчилар «Янги Ўзбекистон» ислоҳотларига, хусусан, иқтисодиёт ва валюта бозорини либераллаштириш, хорижий инвестициялар учун имкониятларни кенгайтириш, халқаро савдони ривожлантириш ҳамда қишлоқ хўжалигини модернизация қилиш борасидаги ишларга эътибор қаратган.
Шунингдек, мамлакатда мажбурий меҳнатдан воз кечиш, давлат бошқаруви, таълим, соғлиқни сақлаш ва давлат хизматлари сифатини оширишга қаратилган ислоҳотлар ҳам эътироф этилган. Ҳисоботда Мирзиёевнинг очиқликка асосланган ташқи сиёсати Ўзбекистоннинг халқаро майдондаги дипломатик ва иқтисодий ҳамкор сифатидаги нуфузини оширишга хизмат қилгани қайд этилган.
Президентнинг ислом меросини асраб-авайлаш ва тарғиб қилиш борасидаги фаолияти ҳам алоҳида таъкидланган. Хусусан, масжидларни қуриш ва таъмирлаш, ҳаж ва умра зиёратлари учун имкониятларни кенгайтириш, тарихий қадамжолар ва мақбараларни обод этиш ишлари қайд этилган.
Ҳисоботда Имом Бухорий ва Имом Мотуридий ёдгорлик мажмуалари, Имом Бухорий, Имом Термизий ва Имом Мотуридий халқаро илмий-тадқиқот марказлари фаолияти, тарихий мадрасаларни реставрация қилиш ҳамда Тошкентдаги Ислом цивилизацияси маркази қурилиши ҳам эътироф этилган.
Рейтингнинг Top-50 талигига кирган шахслар аниқ ўринлар билан кўрсатилган. Қолган иштирокчилар эса фаолият йўналишлари бўйича тоифаларга ажратилган.
Тожикистон муфтийси Саидмуқаррам Абдулқодирзода «Диний ишлар маъмурияти» тоифасидан жой олган. Қозоғистон президенти Қосим-Жўмарт Тўқаев «Сиёсат», хонанда Димаш Қудайберген эса «Санъат ва маданият» йўналишида рўйхатга киритилган.
Афғонистон вакилларидан «Толибон» ҳаракати етакчиси Ҳайбатуллоҳ Охунзода 43-ўринни эгаллаган. Шунингдек, мамлакатдан бош вазир ўринбосари Абдул Ғани Бародар, ҳуқуқ ҳимоячилари Малала Жоя ва Сима Самар, ёзувчи Холид Ҳусайний ҳамда қўшиқчи Ариана Саид ҳам рейтингга киритилган. Қирғизистон ва Туркманистон вакиллари рўйхатдан жой олмаган.
Рейтингда илк бор беш киши биринчи ўринни эгаллади
2027 йилги рейтингнинг яна бир янгилиги — биринчи ўринга бирданига беш нафар шахс киритилганидир. Бунга 2026 йил 7 август куни Ар-Риёдда Саудия Арабистони, Туркия ва Покистон етакчилари ўртасида имзоланган «Макка пакти» сабаб бўлган.
Биринчи ўринни Саудия Арабистони қироли Салмон ибн Абдулазиз Ол Сауд, валиаҳд шаҳзода Муҳаммад бин Салмон, Покистон бош вазири Шаҳбоз Шариф, Покистон Қуролли кучлари мудофаа кучлари бош қўмондони Осим Мунир ҳамда Туркия президенти Ражаб Тоййиб Эрдўғон эгаллаган.
Top-50 таликдан, шунингдек, Нью-Йорк мэри Зоҳран Мамдани, Эрон олий раҳнамоси Мужтабо Хоманаий, Сурия президенти Аҳмад Аш-Шараа, Фаластин президенти Маҳмуд Аббос, Миср ва Бирлашган Араб Амирликлари етакчилари ҳам ўрин олган.
