Экополиция рейдида можаро: браконерлар экополиция ходимига тан жароҳати етказди
Бухорода муҳофаза этиладиган ҳудудда қуённи ноқонуний овлаган беш фуқаро аниқланди.
Бухоро вилоятининг Пешку туманида муҳофаза этиладиган ҳудудда ноқонуний ов қилган беш нафар фуқаро экополиция ходимларининг қонуний талабларига бўйсунмай, уларга қаршилик кўрсатган. Ҳодиса оқибатида ходимлардан бири тан жароҳати олиб, шифохонага ётқизилган.
Вилоят Экология бошқармаси маълумотига кўра, Пешку туманидаги Қоракир массивида экополиция ходимлари томонидан рейд тадбири ўтказилган.
Текширув давомида туманда яшовчи беш нафар фуқаро муҳофаза этиладиган ҳудудда тақиқланган тунги ёритиш мосламаси ва ов қуролидан фойдаланиб, ноқонуний ов қилгани аниқланган. Натижада жами 13 та қуён овлангани маълум бўлган.
Ҳолатни аниқлаштириш жараёнида ходимлар ҳаракатланиб келаётган UAZ русумли автомобилни текшириш учун тўхтатган. Бироқ автомобилдаги фуқаролар уларнинг қонуний талабларига бўйсунмай, қаршилик кўрсатган.
Ҳодиса давомида экополиция ходимларидан бири тан жароҳати олган. Унга биринчи тиббий ёрдам кўрсатилиб, шифохонага ётқизилган. Воқеа жойига туман ички ишлар бўлими ходимлари ҳам жалб этилган.
Айни пайтда ҳолат юзасидан прокуратура органлари томонидан терговга қадар текширув олиб борилмоқда. Текширув якунлари бўйича қўшимча маълумот берилиши билдирилган.
