QR-кодсиз автомобиль берилмайди: эвакуаторга юкланган машинани қайтариб олиш қийинлашади
Тошкентда автомобилларни эвакуация қилиш ва жарима майдонларида сақлаш тартиби ўзгаради.
24 декабрдан бошлаб Тошкентда автомобилларни эвакуатор орқали олиб кетиш ва жарима майдонларида сақлаш жараёни янги қоидалар асосида ташкил этилади. Бутун жараён, автомобилни юклашдан тортиб эгасига қайтаришгача, ягона электрон тизим орқали амалга оширилади.
Бу ҳақда Марказий йўл ҳаракатини бошқариш маркази (TsODD) матбуот хизмати маълум қилди.
Янги қоидаларга кўра, ҳайдовчи автомобилни эвакуаторга юклаш бошланишидан олдин етиб келиб, қоидабузарликни бартараф этса, транспорт воситаси жарима майдонига олиб кетилмайди. Бироқ юклаш жараёни бошланганидан кейин автомобилни олиб кетишни тўхтатиш мумкин бўлмайди.
Шунингдек, автомобилни сақлаш учун тўлов юклаш бошланган вақтдан эътиборан ҳар бир сутка учун ҳисобланади. Транспорт воситаси эгасига фақат электрон тизим орқали шакллантирилган QR-кодли рухсатнома асосида топширилади.
Агар автомобиль олти ой давомида жарима майдонидан олиб кетилмаса, уни сақлаш билан боғлиқ қарздорлик мажбурий ундирилади. 12 ой ўтгач эса суд транспорт воситасини эгасиз деб топиши мумкин.
Эвакуация ва сақлаш нархлари
Тошкентда автомобилни олиб кетиш хизмати учун бир километрга 88 минг сўмгача, бироқ жами 1 млн 760 минг сўмдан ошмайдиган миқдорда ҳақ белгиланган.
Жарима майдонида сақлаш нархи эса бир сутка учун 88 минг сўмгача бўлади.
Масалан, автомобилни 3 километр масофага олиб кетиш ва жарима майдонида 3 сутка сақлаш учун жами 528 минг сўмгача тўлов талаб этилиши мумкин. Бу суммага йўл ҳаракати қоидабузарлиги учун белгиланган жарима кирмайди.
